Maharashtra today news
BreakingNews,Police Administration Maharashtra Newsराज्य राखीव पोलीस दलाचे समादेशक तुषार पाटील यांचे निधन
दौंड, प्रतिनिधी : राज्य राखीव पोलीस दल (SRPF) दौंडचे समादेशक तथा अपर पोलीस अधीक्षक तुषार पाटील (वय 45) यांचे आज उपचारादरम्यान दुर्दैवी निधन झाले. त्यांच्या निधनाने पोलीस दलात हळहळ व्यक्त केली जात आहे.
तुषार पाटील यांनी यापूर्वी कोल्हापूर शहर पोलीस उपाधीक्षक म्हणून उल्लेखनीय कामगिरी बजावली होती. तसेच अलीकडेच त्यांनी पीसीआरचे अधीक्षक म्हणूनही जबाबदारी सांभाळली होती. सुमारे सहा महिन्यांपूर्वी त्यांची दौंड येथील राज्य राखीव पोलीस दलाच्या समादेशकपदी नियुक्ती झाली होती.
मिळालेल्या माहितीनुसार, दोन दिवसांपूर्वी त्यांना रक्ताची उलटी झाल्याने पुण्यातील रुबी हॉल क्लिनिकमध्ये दाखल करण्यात आले होते. उपचारादरम्यान त्यांची प्रकृती गंभीर बनली आणि ते कोमात गेले होते. अखेर आज उपचार सुरू असतानाच त्यांची प्राणज्योत मालवली.
विशेष म्हणजे, सुमारे आठ वर्षांपूर्वी त्यांच्यावर किडनी प्रत्यारोपण शस्त्रक्रिया करण्यात आली होती. त्यावेळी त्यांच्या वडिलांनी त्यांना किडनी दान केली होती. त्यानंतर त्यांची प्रकृती चांगली होती आणि ते नियमितपणे आपल्या सेवेत कार्यरत होते.
कोल्हापूर येथे जिल्हा परिषदेजवळील एका अपार्टमेंटमध्ये त्यांचे वास्तव्य होते. त्यांच्या निधनाची बातमी समजताच पोलीस अधिकारी, कर्मचारी आणि विविध क्षेत्रातील मान्यवरांनी शोक व्यक्त केला.
त्यांच्या पश्चात आई-वडील, पत्नी शिल्पा नाईक, मुलगा संकेत आणि एक भाऊ असा परिवार आहे.
दरम्यान, त्यांच्यावर उद्या (दि. ___) सकाळी ९ वाजता जामनेर, जि. जळगाव येथील त्यांच्या मूळ गावी शासकीय इतमामात अंत्यसंस्कार करण्यात येणार आहेत.
तुषार पाटील यांच्या अकाली निधनाने पोलीस दलाने एक कर्तव्यदक्ष, संवेदनशील आणि जनतेशी जिव्हाळ्याने वागणारा अधिकारी गमावला आहे.
