Crime news Gambling / Illegal Activities दौंड तालुक्यातील केडगावमध्ये ऑनलाइन चक्री जुगाराचा विळखा; अनेक कुटुंबांचे आयुष्य उद्ध्वस्त

Maharashtra Today News January 08, 2026

प्रतिनिधी राम कांबळे,,,,

दौंड तालुक्यातील केडगाव गावात सध्या ऑनलाइन चक्री (ऑनलाइन जुगार) या अवैध प्रकाराने धोकादायक रूप धारण केले असून यामुळे गावातील सामाजिक व आर्थिक परिस्थिती गंभीर बनली आहे. या ऑनलाइन चक्रीमुळे अनेक कुटुंबांचे आयुष्य उध्वस्त झाले असून काही तरुणांनी नैराश्यातून टोकाचे पाऊल उचलत आत्महत्या केल्याच्या घटना समोर आल्या आहेत.

स्मार्टफोन आणि इंटरनेटच्या सहज उपलब्धतेमुळे तरुण पिढी मोठ्या प्रमाणात या ऑनलाइन चक्रीच्या जाळ्यात अडकत आहे. सुरुवातीला कमी पैशांत मोठा नफा मिळतो या आमिषाने सुरू होणारा हा प्रकार पुढे प्रचंड आर्थिक नुकसान, कर्जबाजारीपणा आणि मानसिक तणाव यामध्ये रूपांतरित होत आहे. अनेकांनी आपल्या बचतीसह शेती, दागदागिने आणि कुटुंबाची पुंजी या जुगारात गमावल्याची माहिती आहे.

या प्रकारामुळे केडगावमध्ये कुटुंबांत तणाव, वादविवाद वाढले असून काही घरांमध्ये उपासमारीची वेळ आली आहे. विशेष म्हणजे नव्या पिढीतील युवक आणि विद्यार्थी मोठ्या प्रमाणात या ऑनलाइन चक्रीच्या नादात अडकत असल्याने पालकांमध्ये तीव्र चिंता व्यक्त केली जात आहे.

गावकऱ्यांकडून प्रशासन व पोलिसांकडे या ऑनलाइन चक्री जुगारावर तात्काळ कारवाई करण्याची मागणी होत आहे. संबंधित ॲप्स, वेबसाइट्स आणि एजंट्सवर कठोर कारवाई करून दोषींवर गुन्हे दाखल करावेत, अशी मागणी नागरिकांनी केली आहे. तसेच युवकांचे समुपदेशन, जनजागृती मोहीम आणि ऑनलाइन जुगाराविरोधात कडक उपाययोजना राबवण्याची गरज व्यक्त होत आहे.

जर वेळीच ठोस पावले उचलली गेली नाहीत, तर केडगावसह परिसरातील अनेक गावांमध्ये हा प्रश्न आणखी गंभीर होण्याची भीती नागरिक व्यक्त करत आहेत.

Crime News

Social Issues

Local News

Cyber Crime

Gambling / Illegal Activities