 |
ॲड. गुणाजी मोरे यांचा उमेदवारी अर्ज दाखल; गोरगरिबांचे खरे आवाज म्हणून आम आदमी पार्टीकडून प्रभाग क्रमांक 8 मधून प्रवेश
फुरसुंगी–उरुळी देवाची नगरपरिषद सार्वत्रिक निवडणूक 2025 च्या पार्श्वभूमीवर राजकीय वातावरण तापत असताना आज आम आदमी पार्टीतर्फे ॲड. गुणाजी संभाजी मोरे यांनी प्रभाग क्रमांक 08 मधून अधिकृत उमेदवारी अर्ज दाखल करून निवडणूक रणसंग्रामाची जोरदार सुरुवात केली.
ॲड. मोरे हे स्थानिक पातळीवर गोरगरिबांचे खरे लढवय्ये म्हणून ओळखले जातात. न्यायालयीन क्षेत्रातील त्यांच्या दीर्घ अनुभवातून त्यांनी नेहमीच वंचित, दुर्बल आणि आर्थिकदृष्ट्या कमकुवत घटकांना आधार दिला. अनेक प्रकरणांमध्ये त्यांनी विनामूल्य किंवा अत्यल्प दरात कायदेशीर मदत पुरवून समाजातील सर्वसामान्यांच्या न्यायहक्कांसाठी लढा दिला आहे.
सामाजिक बांधिलकीची जाणीव, लोकांशी जवळीक आणि हक्कांसाठी निर्भीडपणे भूमिका घेण्याची वृत्ती यामुळे त्यांच्या नेतृत्वावर स्थानिक नागरिकांचा विश्वास अधिक दृढ झाला आहे. आम आदमी पार्टीच्या संघटनेतही त्यांनी सातत्याने मेहनत घेत सक्रिय कामगिरी केली असून त्यांची प्रतिमा कर्मठ, स्वच्छ आणि जबाबदार कार्यकर्त्याची आहे.
उमेदवारी अर्ज दाखल करताना कार्यकर्ते, पदाधिकारी आणि नागरिक मोठ्या संख्येने उपस्थित राहिले. मोरे यांना मिळालेला उत्स्फूर्त प्रतिसाद प्रभागातील जनतेच्या अपेक्षा आणि विश्वास अधोरेखित करणारा होता.
अर्ज भरल्यानंतर बोलताना ॲड. मोरे म्हणाले,
“माझी उमेदवारी ही केवळ राजकारणासाठी नाही; गोरगरिबांच्या न्यायाच्या लढ्यास अधिक बळ देण्यासाठी आहे. स्थानिक समस्या दूर करणे, पारदर्शक प्रशासन आणणे आणि सर्वांसाठी समान संधी निर्माण करणे—यासाठी मी जबाबदारी स्वीकारत आहे.”
फुरसुंगी–उरुळी देवाची नगरपरिषद निवडणुकीत विविध पक्षांचे उमेदवार तयारीत असून मतदारांमध्येही उत्सुकता वाढत आहे. ॲड. मोरे यांच्या प्रवेशामुळे या निवडणुकीतील स्पर्धा अधिक रंगतदार होणार असल्याची चर्चा राजकीय वर्तुळात सुरू आहे.
